為情人而煮飯
相信每個拍拖嘅人都曾經試過為對方煮一餐飯，明明自己從未入廚都會做，我仲記得第一次住，好似係煎個雞翼、炒個菜、蟹柳炒蛋再加個罐頭粟米湯。
所以話年輕真好，咁就一餐，兩個人都sweet sweet樂也融融。
人大咗，食慣好野，眼界闊咗，相處耐咗變得誠實，就會講真話。
煮一次係情趣、
煮兩次係甜蜜、
煮三四五次係心意，
煮到第一百次，就係食飯。
唔關是否感恩事，多謝你煮之餘，亦都想好食，我諗每個人都明。
上一次講到煮飯比老婆食佢都彈呢樣個樣，聽到故然會唔高興，但你面前只有兩個選擇：
一，唔鐘意就算，以後唔煮；
二，煮到好食到佢會讚出返口氣。
咁明顯第二點報復心理會覺得到時乜仇都報晒啦！如果因為佢一句就唔再煮，會比佢講成世呢！
對於一個門外漢講，煮飯可以落到肚都可以，但我諗煮麵同腸仔可以達到外面水準之外，真係炒個菜都唔會合格……
我問佢：如果我想煮一樣你覺得滿意嘅菜式，你會想食乜，佢話白酒蜆意粉。
然後我諗起之前同佢食過一次白酒蜆意粉，有時佢唔開心都會特登去食，個味道都有少少印象嘅，係幾好食；其後佢再係其他地方食，無讚過，我老婆就係咁，佢認定一樣野係好，其他都係差，因為佢心入面已經有咗前設，以我認識嘅佢，要令佢覺得好食，真係不可能的任務。
下定決心之後，上網睇食譜，文字版又睇過，片又睇過，專業同唔專業都睇過，第一次出碟，我問佢幾分，好似剛剛合格，唔好食亦唔難食，意粉唔夠乾身，蜆同白酒味唔夠出等等。
經過痛定思痛之後，我再接再勵，改善咗佢講嘅問題，再上碟，今次有60分。
我同佢講，我好想煮到一樣你覺得滿意同好好食嘅野，咁你以後都會記住我，出面食唔到，要我煮先煮到，我會一直煮，煮到成功為止！
佢哦咗聲，少少感動都無。
我唯有再講，你唔滿意，我會繼續煮喎，日日都煮，餐餐都煮，煮到你滿意為止喎！
佢終於明自己即將要面對咩情況，就係日日都食同一樣野，最後佢理解到我嘅心意，我嘅熱誠，我嘅愛之後，將分數調整到100分。
趣事分享完，但其實煮到一餐對方真心滿意嘅飯，會有一種成就感。
只要有錢，任何人都可以食到米芝蓮三星嘅食物，但自己煮而好食的，再多錢都搵唔到。
假如有日我死先過你，我要每次你食白酒蜆意粉都諗起我！
Search